Rebulir representará a Galicia no Folk Azores de Ramirás

O Colectivo Rebulir participará entre os días 8 e 18 de agosto no prestixioso Folk Azores, o maior festival de folclore de Europa neste ano, que terá lugar na illa Terceira (Azores, Portugal), na cidade de Angra do Heroísmo. O evento contará coa presenza de 18 compañías internacionais procedentes de catro continentes.

O Folk Azores non só é un dos eventos culturais de maior envergadura en Europa no ámbito do folclore, senón que foi recoñecido en múltiples ocasións polo Consello Internacional de Organizacións de Festivais de Folclore e das Artes Tradicionais (Cioff) como o mellor festival do mundo.

Tras presentar a súa candidatura en varias ocasións, Rebulir logra este ano ser seleccionado. Nesta ocasión, unha delegación de 35 persoas será a encargada de levar a esencia da cultura galega aos Azores, amosando un repertorio coidadosamente traballado que combina fidelidade á tradición, innovación escénica e unha posta en escena de alta calidade. Neste 2025, Rebulir celebra 20 anos de traxectoria, consolidándose como unha das entidades culturais máis activas do panorama galego.