Máis de 6.300 espectadores consolidaron o éxito da MIT

A 41ª Mostra Internacional de Teatro (MIT) de Ribadavia consolidou a fidelidade do público nunha edición de transición, cunha nova dirección encabezada por Sabela Mendoza e Gena Baamonde, que recibiu o respaldo do público, superando os 6.300 espectadores e batendo todos os récords históricos de venda de abonos.

O alcalde de Ribadavia, César Fernández, valorou “o impulso non só cultural, senón tamén social e económico para toda a comarca. A MIT volve demostrar que é un dos eventos culturais máis importantes de Galicia e que Ribadavia é un lugar de referencia para a creación escénica contemporánea”.

A nova dirección amosouse satisfeita pola acollida: “Estabamos convencidas de que todo o que se ía a presentar nesta MIT tiña unha enorme calidade e non defraudou”, sinalou Mendoza.

A programación incluíu 24 espectáculos de teatro, danza, performance, circo e artes vivas, ás que se uniron outras actividades paralelas en máis dunha ducia de espazos escénicos. Houbo representación de países como Portugal, Italia e Brasil, xunto a Galicia, combinando propostas intimistas con outras de gran formato.

A MIT acolleu tamén tres residencias artísticas, seis talleres formativos, un programa de mediación escénica e actividades en aldeas como San Cristovo, Sampaio, A Franqueirán ou Francelos, fortalecendo así o seu carácter descentralizador e comunitario.