A MIT encherá Ribadavia de teatro do 18 ao 26 de xullo

A 41ª edición da MIT-Mostra Internacional de Teatro de Ribadavia desenvolveráse do 18 ao 26 de xullo do 2025, iniciando unha nova etapa con Sabela Mendoza como directora artística e Gena Baamonde como directora adxunta.

A dirección da MIT adiantou que esta edición dará continuidade e ampliará os valores e liñas de acción habituais do festival, combinando experiencia, tradición e vangarda, e incluíndo nomes internacionais de referencia, hibridación de linguaxes, talento galego emerxente e consolidado, coproducións, residencias, premios e actividades paralelas.

O lema escollido, “Escenas en tránsito”, pon o foco en propostas que exploran a mobilidade entre linguaxes, corpos e territorios. Unha proposta coa que as directoras buscan “seguir facendo da MIT un festival internacional de referencia para as artes escénicas contemporáneas, unha cita cultural de orgullo colectivo e un contexto artítico de primeiro nivel que celebra a pluralidade e a diversidade”.

Así, apostaráse pola mellor creación galega e internacional, incorporando novos nomes e figuras establecidas do panorama escénico, ligando memorias e legados a novas dramaturxias e promovendo a mestura de estilos e formatos, con iniciativas que fomenten a creación, a produción e o diálogo entre profesionais e público.

No marco da MIT convócase a 20ª edición do Premio Abrente, que galardona con 4.000 euros o mellor texto teatral, ademais de ofrecer a súa publicación e apoio para a súa posta en escena.