Uxía, cantautora en Ribadavia: “A música é a miña ferramenta para comunicarme coas persoas e co mundo”

Uxía chega a Ribadavia co concerto “Será por Flores”, co que celebra corenta anos de traxectoria musical. Dende os seus comezos ata hoxe houbo unha evolución, pero sen esquecer nunca a música de raíz e a capacidade de transmitir e emocionar que caracteriza á artista, e que o público poderá desfrutar esta tarde ás 18,00 horas no Auditorio da vila.

Pregunta.¿Como foi a súa evolución en 40 anos de traxectoria?

Respuesta.Sempre fun unha artista inquieta. Dende que comecei en 1985, cando gañei o Festival de Bergantiños, ata hoxe fun cambiando grazas ás viaxes, ao contacto con outras culturas ou a apertura á lusofonía, que me marcou profundamente. Pero mantiven sempre a música de raíz, as miñas cancións e o compromiso coa nosa identidade, coa poesía e coa lingua galega. Foi un camiño cheo de espiñas e tamén de rosas e de flores moi diversas. Por iso, con “Será por Flores” quero celebrar estes 40 anos en activo.

P.¿De onde sae a inspiración despois de tantos anos?

R.A inspiración hai que cultivala. Vén das vivencias, da reflexión sobre a condición das mulleres e o que temos pasado para chegar ata aquí; de todo o que implica esta terra e as súas peculiaridades, ou dos temas universais como o amor ou o desamor. O feito de estar no mundo, se vives intensamente, che fai escribir cancións, que é a miña ferramenta para comunicarme coas persoas e co propio mundo.

P.¿Como se está a acoller a xira?

R.Estou feliz porque a resposta está sendo extraordinaria. Creo que a xente vén para celebrar comigo esta viaxe, que é unha proposta máis escénica e moi coidada, cunha escenografía de Carlos Alonso e con Ugia Pedreira e Marina Oural na dirección escénica e cunha banda de músicos dirixida por Pablo Novoa, con Sergio Tannus, Isaac Palacín, Santi Cribeiro e coa estrea de Yudit Almeida no contrabaixo.

P.¿Como será o concerto?

R.Estará cheo de sorpresas, con moitas cancións propias e tradicionais, e cunha escenografía na que as flores forman parte. Acompañaranme A Voz das Mouras, Quim Farinha, as miñas irmáns Chus e Ana, a miña sobriña Nuria Freiría, que é profesora no instituto de Ribadavia e toca a requinta que e un instrumento moi noso, e Marta Bravo, directora de Repenica, que traerá dúas rapaciñas para cantar. Será unha ponte interxeneracional moi fermosa.

P.¿E que supón para Uxía actuar en Ribadavia?

R.Ribadavia é un lugar importantísimo para a nosa cultura teatral e musical, cunha banda tradicional como a da Lira. É unha volta a un lugar histórico e fermoso que me inspira e que quero celebrar con todos. Convido a xente a que veña e desfrute. Hai momentos da actuación nos que invito a cantar e creo que é moi bonita esa comunicación.