A Xunta renova o apoio á MIT con 60.000 euros

O conselleiro de Cultura, Lingua e Xuventude, José López Campos, e o alcalde de Ribadavia, César Fernández, asinaron onte o convenio polo que a Xunta renova a súa contribución anual á organización da Mostra Internacional de Teatro de Ribadavia (MIT) cunha achega de 60.000 euros.

O Goberno galego recoñece “o papel fundamental do certame ribadaviense nos primeiros pasos e na evolución do actual teatro profesional galego, así como a súa condición de evento cultural de referencia de Galicia”.

A MIT, que se celebrará do 18 ao 26 de xullo, incorpora nesta 41 edición un novo equipo artístico, con Sabela Mendoza e Gena Baamonde ao fronte, cunha aposta pola contemporaneidade, a diversidade, a mirada feminista e os formatos híbridos. Entre os participantes estarán formacións galegas como Ibuprofeno Teatro, Ártika Cía. ou Ítaca Teatro, xunto a nacionais como Luz Arcas ou La Volátil; e internacionais, coa compañía portuguesa Circolando, a italiana Parini Secondo ou a residencia da creadora lusa Patricia Portela.