Vilanfesta, dos enterros á festa

Grazas á xuntanza de veciños, o relevo xeracional e emocional está garantido en Vilanfesta.

Como en cada boa aldea, os habitantes de Vilanfesta teñen todos alcumes, herdanza atemporal que vai pasando de pais a fillos, de xeración en xeración. Plantas, Pesetas, Guichos, Xondes, Carballos, Ferreiros, Mouráns, Corte, Picardías e Carrales son os nomes das familias e dos descendentes das casas que chegou a ter este pequeno núcleo da parroquia de Oseira, en Cea. Habitado no século pasado por preto de 40 veciños, na actualidade apenas resisten catro matrimonios.

O inexorable paso do tempo foi despoboando un lugar xa pouco habitado de por si. A meirande parte marchou a outras localidades, houbo quen emigrou fóra e ata quen acabou por vender a casa, perdendo así toda ligazón material con Vilanfesta.

Pero no canto de resignarse, un grupo de persoas nacidas ou descendentes dalí decidiu crear a “festa” que Vilanfesta nunca antes tivera: a Xuntanza dos Veciños. Unha celebración da historia colectiva e compartida que este ano cumpre a súa terceira edición, e que terá lugar o vindeiro 20 de xullo, domingo.

Mila Gil Fernández é unha desas persoas orixinarias de Vilanfesta, pero que xa só volve “tódolos domingos, sen falta” para xantar cos familiares que aínda viven alí. Tralo pasamento dun veciño, Mila comentou con algúns dos asistentes que “só nos vemos nos enterros”, polo que puxéronse mans á obra para organizar un xantar “para que os oito que aínda permanecen se sintan acompañados”.

A festa xurdiu por un enterro no que nos xuntamos varios veciños. E dixemos: Isto non pode ser, só nos vemos nos enterros

Ao non ter campo da festa, ese día Vilanfesta corta a estrada que o atravesa para poder albergar a paparota, na que non falta a carne cocida nin o pulpo do Fuchela, e que o ano pasado reuniu a 110 persoas. “Algúns levaban 20 anos sen pasar pola aldea”, asegura Mila.

Veciños que aínda viven na aldea, no “photocall” enxebre con familiares.

Photocall e proxeccións

Nas outras xuntanzas desveláronse colaxes con imaxes antigas, e proxectouse un emotivo vídeo sobre a historia de Vilanfesta. Este ano volverá haber un “photocall” enxebre no que posar para as fotos, co fin de seguir sumando recordos.