Sandiás cartografía de xeito dixital o seu rueiro

O Concello de Sandiás vén de rematar o proxecto de elaboración do Sistema de Información Xeográfica (SIX) do Concello, no que se recollen diferentes capas de información como a cartografía actualizada do catastro, a ortografía recente e a delimitación de parroquias e barrios segundo os datos municipais.

Unha vez rematado este traballo de dixitalización, confeccionouse un listado das vías e números municipais, para elaborar novas placas de sinalización, unhas 1.100, feitas de PVC e que inclúen a rotulación do número municipal, a rúa, a parroquia, o escudo e o nome do Concello.

O alcalde de Sandiás, Felipe Traveso, destacou a relevancia desta iniciativa: “O máis importante é que os veciños poderán ter unha dirección clara e oficial na vivenda a efectos de calquera notificación, así como dar unha resposta máis rápida ante calquera problema de seguridade cidadá”.

Dende o Concello consideran “de grande importancia” estes dous proxectos para ubicar e identificar mellor as direccións, elaborar censos electorais, servir de apoio aos servizos de emerxencia ou confeccionar padróns fiscais.

Os traballos descritos realizáronse cun presuposto de 13.915 euros, dos que a Deputación de Ourense achegou 6.957,50 euros e o resto o Concello de Sandiás.