Sandiás comeza os obradoiros de estimulación cognitiva

A Asociación de Alzhéimer de Ourense (Afaor), en colaboración coa Concellería de Política Social e Participación Cidadá do Concello de Sandiás, ofrecen a cuarta etapa dos “Obradoiros de Psicoestimulación e prevención do deterioro cognitivo” destinados a persoas maiores válidas e/ou con deterioración cognitiva leve. Son de carácter gratuíto e desenvolveranse o longo de 2025, sendo esta a cuarta edición deste proxecto que comezou en 2022. A primeira sesión será o vindeiro venres, 4 de abril, ás 17,00 horas no Local Social de Sandiás. Para inscribirse nos obradoiros debe facerse a través da web ou do teléfono do Concello, e as prazas son limitadas.

Estimulación cognitiva

Nestes obradoiros traballarase a psicomotricidade a través da estimulación cognitiva, mellorando a memoria, atención, linguaxe e fluidez para achegar un envellecemento activo, tratando de poñer o cerebro a funcionar mediante actividades mentais como o cálculo, o razoamento, memorización e atención. Estas sesións prácticas son de noventa minutos, nas que se traballa de xeito individual e colectivo para mellorar a comunicación interpersoal. Tamén se aproveita para loitar contra a soidade e crear tecido comunitario onde os veciños poidan dialogar.