Axentes ambientais recolleron mostras do vertido na lagoa de Antela, en Sarreaus

POSIBLE CONTAMINACIÓN

O vertido nunha antiga explotación na lagoa de Antela en Sarreaus xa está sendo analizado pola Consellería de Medio Ambiente para determinar a súa composición e orixe

Vertido na lagoa de Antela, o xoves en Sarreaus. | Bruno Losada

Despois de que este xoves un veciño alertara de que a auga dunha zona da lagoa da Antela en Sarreaus se tinguira dunha intensa cor vermella, este venres á mañá axentes ambientais da Dirección Territorial da Consellería de Medio Ambiente e Cambio Climático en Ourense recolleron mostras, tras unha inspección ocular na que constataron a “coloración inadecuada da auga”.

Malia que aínda se descoñece a orixe do vertido, sospéitase que podería provir dunha vella embarcación, parcialmente afundida, empregada nesta antiga explotación areeira pola empresa Feldespatos Sarreaus, desaparecida hai máis dunha década, e que contiña uns 5.000 litros de combustible que se estarían filtrando á agua, contaminando o medio e o acuífero da Limia.

A situación de abandono da embarcación, coñecida coma o “Prestige da Limia”, xa fora obxecto de denuncias públicas por parte de veciños e formacións como o BNG.

Aviso a Confederación

Dado que este episodio se produce nun espazo incluído na área competencial da Confederación Hidrográfica Miño-Sil (CHMS), a Dirección Territorial da Consellería “trasladaralle esta cuestión ao organismo”, co fin de que “adopte as medidas oportunas para poñerlle fin no marco das súas competencias”. Ademais, apuntan que no pasado mes de setembro, tras detectarse na mesma zona un vertido de sustancias iridiscentes, xa deran “traslado á CHMS da denuncia efectuada por axentes ambientais”.

Gumersindo Lamas, alcalde de Sarreaus, tamén visitou o vertido e notificou a Seprona, ademais do resto de organismos. Defende que o Concello non ten “competencias nin capacidade” para sacar o barco, apunta á responsabilidade de “Aliseda, que adquiriu os terreos da areeira” e recalcou que Xunta e CHMS deben “arrimar o ombreiro”: “Non me importa de quen é competencia, senón que se solucione”.

Protagonista do pleno

Agustín Martínez, voceiro do BNG en Sarreaus, preguntou o venres a Lamas polo vertido durante o pleno, chegando a pedir a súa “dimisión” pola súa “deixadez”, tras lembrar que os nacionalistas xa alertaran da posibilidade dun vertido “no verán”. Lamas replicou que o Concello non é “responsable”, que a Xunta xa dera aviso ao “órgano competente, a Confederación”, e que volverá “notificar a tódolos organismos”.