Un “congresiño” para loitar contra o despoboamento

Nenos e nenas de toda a comarca participaron onte pola mañá no primeiro “Congresiño polo despoboamento da Limia”, que tivo lugar no Centro de Desenvolvemento Rural O Viso.

Estes “especialistas” na materia, fixeron traballo de campo antes da celebración do “congresiño”, para poder falar e esgrimir argumentos sólidos. A cativada dividiuse en varios grupos para realizar diferentes tarefas, entre as que se atopaba quitar fotos por Lodoselo e falar ca xente maior. O “congresiño” estivo presentado por María Lucía, de Xinzo.

Nacementos

A capacidade de síntese que ofrecen os cativos non é cousa nimia, e resumen en poucas palabras situacións que levan sendo obxecto de estudo durante décadas. Uxía, de Trasmiras, apuntou que con tan só 7 anos puido comprobar que “morre máis xente da que nace”, ó que Iago, de Abavides, propuxo unha solución simple, malia que non sinxela, “hai que reproducirse máis”.

Brais e Ismael, de Morgade e Xinzo, fixeron unha recopilación fotográfica da situación das vivendas en Lodoselo, e con 10 e 11 anos, afirmaron con rotundidade que ó quitar as que están xa habitadas e as que están en ruinas, “a poucas casas pode vir a xente vivir”.

Outras das esixencias que os cativos consideran “mínimas” é o acceso ós servizos. Emma, de Xinzo e Lúa, de Lodoselo, con 12 e 8 anos, fixeron fincapé nesta cuestión, afirmando que “é que senón non van querer vir a vivir aquí”.

Como non podía ser doutro xeito, o “congresiño” rematou cunha parte máis lúdica, na que varias cativas recrearon como afectou o despoboamento ó longo dos anos. Logo, Alba de Sabariz cantou, xunto a moitos dos seus compañeiros, o tema “Semente de revolución”, do grupo das Xingras, do que forma parte.

Esta actividade forma parte do programa de sensibilización e concienciación sobre o despoboamento e a necesidade de emprendemento no medio rural, impulsado por Coceder e financiado polo Ministerio de Dereitos Sociais.