O proxecto Coblages apoiase no traballo do CDR O Viso

A Facultade de Educación e Traballo Social do Campus de Ourense participa dende setembro de 2023 -e continuará ata febreiro do vindeiro ano- no proxecto europeo Coblages, que busca desenvolver unha metodoloxía de aprendizaxe comunitaria na ensinanza superior co obxectivo de ofrecer unha mellor preparación aos estudantes ante un mundo envellecido. O CDR O Viso colaborou nesta investigación cun grupo de nove persoas, capitaneado por tres mulleres do rural: Avelina de Sabariz, Claudina de Lobaces e Rosa de Fotearcada.

O Viso colaborou para estudar a capacidade de xeración de ideas a través de grupos interxeracionais cunha premisa clara: aprender para coidar mellor. Dende o CDR conclúen que os principais factores que determinan os coidados as persoas de maior idade recaen na saúde e na compañía no día a día, apoiados nunha alimentación equilibrada e o esforzo diario, tanto físico coma mental. O equipo de traballo fixo unhas recomendacións para os coidadores profesionais, atendendo a función de guía que cumpren, a importancia de detectar necesidades e prover cobertura destas sen restarlle autonomía ás persoas coidadas.