Aparece unha primeira edición inédita de 'Cantares Gallegos'

Apareceu unha primeira edición de 'Cantares Gallegos' moi especial. Anxo Angueira, presidente da Casa Museo de Rosalía de Castro, presentou onte ante os medios a nova adquisición da Fundación coa financiación da Barrié. Angueira non ocultaba a súa satisfacción: 'É un día moi feliz, unha gran xornada, porque ésta é unha xoia que engade luz sobre o estudo da repercusión que a obra de Rosalía tivo nos seus contemporáneos'. A importancia do libro radica en que foi modificado polo seu primeiro propietario, Ramón Segade, que incorporou unha fotografía descoñecida de Rosalía feita por María Cardarelly, un poema autografado pola autora e que é o único que se conserva coa súa letra, e un manuscrito de Segade onde reproduce a resposta da poetisa Fernán Caballero ao exemplar adicado.

A descuberta e a compra do exemplar tivo lugar na contorna da exposición 'No principio foi o verso' que se mostra na sede viguesa da Barrié polos 150 anos da publicación de 'Cantares Gallegos' e que 'da, di Angueira, proba da repercusión social que está a ter'. Un veciño da cidade (quen prefire permanecer no anonimato) púxose en contacto coa Casa Museo para ofrecer un exemplar tras visitar a mostra. O coste da adquisición, 'moi razoable' por Angueira, tampouco trascendeu. O exemplar amosarase en Vigo ata o 15 de septembro e logo irá á Casa Museo en Padrón.

A fotografía, en bo estado de conservación, non se coñecía. Pertence á mesma serie da que se expón en 'Ao principio foi o verso' que Cardarelly lle fixo en 1863. En canto a carta de Fernán Caballero, sabíase da súa existencia, pero non se atopara.