A gala abriu as Xociviga 2019

Despois da proxección da película "Sempre Xonxa", de Chano Piñeiro, na noite do pasado domingo na Praza Maior, a xornada de este luns das Xociviga do Carballiño iniciouse con dous actos institucionais, coa sinatura dun convenio coa Fundación Carlos Velo, na que participou a presidenta, Carmen Leyte, que lembrou o vínculo do cineasta co Carballiño, ao participar nas Xociviga de 1985.

Ao mesmo tempo destacou o taller de creación que se desenvolverá mediante este convenio, como un impulso para que a xente nova siga no audiovisual.

Marta Villar, comisaria da exposición conmemorativa dos 50 anos de Cine Club, que xa se pode ver no Auditorio Manuel María, destacou a gran cantidade de documentación recopilada, que abarca desde 1969. "Unha xoia do deseño gráfico dos últimos 50 años", apuntou, referíndose aos carteis, programas de man, entradas, libros e ata bonos para a comida dos convidados.

Nos primeiros anos destaca a abundante documentación en papel e na década dos 80 cando irrompe a cor no deseño, mentres que a partir do 2000, coas novas tecnoloxías, xa prevalece o deseño gráfico dixital.

A actriz Iria Sobrado foi a encargada de dirixir a gala de apertura, que tiña lugar a partir das 20,30 horas. Venezuela ten un protagonismo especial nesta edición e o produtor de orixe ourensán, José Sousa, recibía a homenaxe In Memorian OUFF-Xociviga, que recollía a súa filla, Ana Patricia Sousa.

Tamén, con motivo do 50 aniversario de Cine Club foron galardoados coa Insignia de Ouro os seus fundadores: Eduardo Bernárdez, Javier Romero, José María Álvarez, José Luis Cesáreo Gay, Julio Ángel Marqués e Pablo Pedro Paniagua.

A actriz Luisa Merelas subía a continuación ao escenario para recoller o Xociviga de Honra 2019, encargándose as actrices Elina Luaces e Amalia Gómez da Laudatio da homenaxeada.

4Mal Quartet Jazz, grupo de jazz nado no Carballiño, foi o que puxo música a esta gala, interpretando varias pezas. Rematando cunha degustación de produtos ourensáns para os asistentes.