Galaxia e Martín Códax, entre os premios da Cultura galega

O xurado dos Premios da Cultura Galega 2024 reuniuse onte en Santiago de Compostela para outorgar os recoñecementos desta edición. A xuntanza, que tivo lugar na Cidade da Cultura de Galicia, estivo presidida polo conselleiro de Cultura, Lingua e Xuventude, José López Campos. Ao remate da mesma, fíxose público o fallo nas distintas categorías propostas.

Na categoría de Letras foi distinguida a Editorial Galaxia. Na de Artes Visuais, a Bienal de Arte de Pontevedra; en Artes Escénicas, a Mostra Internacional de Teatro Cómico e Festivo de Cangas; e na de Música, as Bodegas Martín Códax. O galardón do apartado Audiovisual foi para Baños Films. En Lingua premiouse a campaña “Aquí tamén se fala”; en Patrimonio Cultural, Antón Corral; e en Proxección exterior, o programa de radio “Sempre en Galicia”.

Do xurado tamén formaron parte o director xeral de Cultura, a directora xeral da Promoción da Igualdade, María Quintiana; o reitor da Universidade de Santiago de Compostela, Antonio López; o presidente da Real Academia de Belas Artes, Manuel Quintana Martelo; a vicepresidenta segunda do Consello da Cultura Galega, Dolores Vilavedra; e María López Sández, en representación do presidente da Real Academia Galega. Tamén profesionais de recoñecido prestixio, como Esther Estévez, xornalista; Alberto Sueiro, director do Festival Internacional Outono de Teatro; Verónica Santos, directora de Acción Cultural na Fundación Cidade da Cultura; e Andrea González, pianista e directora do festival IKFEM. Ademais, exerceu como secretaria Mª Carmen Calviño, subdirectora xeral de Arquivos e Centros Museísticos da Xunta.

Segundo indicou o goberno galego nunha nota de prensa, con estes galardóns, a Xunta distingue un ano máis a excelencia creativa, a capacidade de intercambio, a experimentación e a proxección do panorama cultural galego, así como o compromiso de proxectos e traxectorias que enriquecen a identidade cultural de Galicia.

“Sempre en Galicia”, que vén de celebrar o seu 75 aniversario, é un programa de radio emitido dende o Uruguai por Radio Oriental os domingos pola mañá. A Editorial Galaxia é outra iniciativa veterana. Foi fundada o 25 de xullo de 1950 e leva editados uns 2.800 volumes, cun catálogo de máis de mil títulos. Entre os seus fundadores estiveron Ramón Otero Pedrayo e Francisco Fernández del Riego.

Pola súa banda, Bodegas Martín Códax mantén unha intensa actividade de mecenado musical. Desde 2013 organiza os Premios Martín Códax da Música, que promoven artistas e proxectos de folk, rock, jazz e xestión musical.