O Mago Teto chegará a Vilar de Barrio o venres

As instalacións polideportivas do municipio de Vilar de Barrio acollerán este venres, día 30 de agosto, un espectáculo de maxia de mans do popular Mago Teto. A actividade está enmarcada dentro do programa "O teu Xacobeo", promovido pola Xunta de Galicia.

Todos os cativos e familias que non se queiran perder esta actuación chea de moita ilusión e sorpresas terán que achegarse ao polideportivo do concello a partir das 19,30 horas.

Baixo o título de "O afiador", o Mago Teto amenizará a tarde do venres cun espectáculo que xirará en torno a unha roda de afiar que foi herdada polo propio mago e que pertenceu, varias décadas atrás, aos seus ancestros.

O de afiador, foi un oficio que tivo o seu máximo apoxeo nos séculos XVIII e XIX pero que, na actualidade, está xa extinguido. As persoas que traballaron como afiadores tiñan que desprazarse centos ou, incluso, milleiros de quilómetros por uns días ou mesmo anos, coa única compañía da súa roda.