Uns 70.000 galegos padecen glaucoma, que representa a segunda causa de cegueira en España

O principal factor de risco para o seu desenvolvemento é a elevación da presión intraocular provocada por unha dificultade na saída do humor acuoso pola súa vía de drenaxe natural, segundo informa o Instituto Oftalmolóxico Gómez-Ulla.

"O glaucoma supón un custo anual por paciente de 2.558 euros, dos cales 612 euros son custos directos e 1.964 euros, custos asociados á perda de produtividade tal e como se recolle no Informe sobre a Cegueira en España 2012 da Fundación Retinaplus+", segundo afirmou o director médico do Instituto Oftalmolóxico Gómez-Ulla, o doutor Francisco Gómez-Ulla, catedrático de Oftalmoloxía e presidente da Fundación Retinaplus+.

Tendo en conta que se estima que o 50 por cento dos pacientes con glaucoma descoñece que o padece, o mellor tratamento para combater esta enfermidade, segundo sosteñen os expertos, é a detección precoz mediante revisións periódicas no oftalmólogo, sobre todo entre os colectivos de maior risco.

Ao respecto, sitúanse entre os colectivos con maior risco persoas de máis de 45 anos, con historial familiar de glaucoma e con antecedentes de traumatismo ocular ou de enfermidades sistémicas como a diabete ou a hipertensión arterial.

XORNADA

Con motivo da celebración do Día Mundial do Glaucoma, o Instituto Oftalmolóxico Gómez-Ulla organizou unha Xornada de Portas abertas na súa nova clínica, en Santiago de Compostela, na que revisará de xeito gratuíto a tensión ocular a todas aquelas persoas que decidan achegarse ás súas instalacións durante a tarde do mércores.

En concreto, a Xornada de Portas abertas terá lugar entre as 16,00 e as 20,00 horas nas instalacións que a clínica ten na rúa Maruxa Mallo, esquina coa Avenida da Liberdade de Santiago.