Iris Gey López: “Cantar nas ermidas as cantigas das nosas raíces literarias é para min un luxo”

Valdeorresa por elección, e despois de tres anos na comarca, veciña das que se contan no padrón, Iris Gey López é unha mestra de Lingua, Literatura e Música de Secundaria, cuxo destino levouna a exercer ao CPI Tomás Terrón Mendaña de Sobradelo, en Carballeda. Nacida na Coruña, hoxe comparte a súa faceta de cantante, presentando o disco que comparte co seu mellor amigo e compositor Xoan Curiel. Xuntos, sacaban á luz no 2022, “Treides Comigo”.

Fálanos de “Treides Comigo”…

Xoan Curiel e mais eu puxemos en marcha un proxecto que foi auspiciado polos fondos Xacobeo da Xunta de Galicia. É o seu séptimo traballo discográfico, él é o compositor da maioría das cancións, eu son cantante. O que fixemos foi poñer música moderna a cantigas medievais galego-portuguesas e desde o periodo trovadoresco, do século doce ao catorce, musicalizamos cantigas da nosa literatura. “Treides” significa “vide”, é dicir, “vide comigo”.

En verán, poderemos escoitalo nas Ermidas…

Tivemos a sorte de cantar nalgunhas igrexas, coma a de San Xoan de Moraime, en Muxía, e a acústica nas igrexas sempre é maravillosa. Poder facelo nas Ermidas é un luxo, o 3 de agosto cantaremos nun esceario maravilloso que non é do mesmo século pero dalle ese ambiente “medievalesco”. Na zona de Valdeorras estamos facendo cousas porque son profe aquí e quero presentar o traballo aquí.

Por iso puidemos escoitarvos na Biblioteca do Barco…

Xoan fixo unha adaptación do seu traballo aos nenos, e presentámolo polas Letras Galegas na Biblioteca do Barco.

Que vai primeiro, a ensinanza ou a música?

A ensinanza vai primeiro, meus pais son profesores, levoo no sangue. Sempre dixen que de maior quería ser profesora e cantante. E cumpriuse. Tamén escribo, gañei premios de literatura, porque me gusta escribir. É certo que escribir e cantar é un sistema de liberación. E teño a sorte de poder facelo desde que coñecín a Xoan en 2007, cando sacou o seu primeiro disco. Hoxe é un dos meus mellores amigos.

Como vos encontrástedes?

Eu vivín toda a miña vida na Coruña. Vin un cartel que buscaban cantante para facer coros. Xoan buscaba publicar o seu primeiro disco “Nai”, e me presentei, coñecino. Logo, no 2020, sacou un disco dedicado a Antón Fraguas cando lle deron as Letras Galegas, “Canta miña terra, canta”. Empezamos a cantar facendo espectáculos, as cantigas ían medrando e sacamos o disco que foi moi premiado e está dando moitas alegrías.