As obras na barquense avenida do Bierzo empezan no verán

A Consellería de Infraestruturas e Mobilidade adxudicou as obras de renovación da avenida do Bierzo, no núcleo urbano do Barco de Valdeorras, por preto de 653.000 euros. Os traballos correrán cargo da empresa adxudicataria, Aglomerados y Construcciones Valdeorras, que conta cun prazo de execución de 8 meses, coa previsión de iniciala este mesmo verán.

Tal e como reflexa o proxecto da Xunta, actuarase nos primeiros 655 metros da estrada autonómica OU-622, o treito da vía cun carácter máis urbano, "para reforzar a seguridade e facer máis humana e accesible a súa contorna", como salienta unha nota da consellería. Está previsto mellorar a accesibilidade nas pontes situadas no inicio da estrada autonómica en 200 metros para salvar a vía ferroviaria e tamén para salvar o río Cigüeño.

Incrementarase o ancho da beirarrúa na marxe esquerda coa fin de mellorar a mobilidade para o tránsito peonil dos veciños, así como a accesibilidade aos edificios localizados na zona, que na actualidade dispoñen de accesos con importantes desniveis.