A Xunta expedienta a unha residencia do Barco de Valdeorras

A Consellería de Política Social da Xunta de Galicia observou “deficiencias” no funcionamento da residencia de maiores e centro de día Nuestra Señora de Fátima, ubicada no Barco de Valdeorras, na última inspección periódica que se levou a cabo, o pasado mes de xuño. A raíz desa inspección e das eivas atopadas, a Consellería instou á dirección do centro a corrixilas de “inmediato”, e abriulle un expediente que nestes momentos continúa aberto e en curso.

Neste senso, o sindicato CIG lamentou onte que a residencia continúa “aberta e funcionando” malia ter sido sancionada por “maltrato e neglixencias”.

Segundo relata a central sindical, o centro barqués xa fora sancionado cunha multa de 38.000 euros por “graves irregularidades”, entre as que se inclúe a “falta de alimentación axeitada”, así como a “retención ilegal dun usuario”, detalla o sindicato.

Confirmado pola Xustiza

Ademais de todo isto, a CIG tamén salienta que as inspeccións realizadas entre 2019 e 2020 “puxeron de manifesto un cúmulo de deficiencias no centro, que foron confirmadas polo Tribunal Superior de Xustiza (TSXG).