O arte provocador de Xosé Rivada regresa a Verín cunha nova exposición

Esta escolma “persoal”, organizada con motivo da Semana das Letras Galegas do Concello de Verín, está formada por pinturas, esculturas e escultopinturas de Xosé Rivada (San Cosmede, Ferreira de Pantón, 1953), creador “incansable” afincado na vila do Támega, onde pasou parte da súa infancia na rúa Traviesa.

Posteriormente viaxou e viviu en medio mundo, especialmente en México, que deixou nas súas creacións unha forte pegada latinoamericana, tanto nas cores, coma nos referentes e nas formas.

Baixo o nome “Pensamentos Fuxidos”, Rivada busca como sempre coa súa arte transmitir unha “crítica” sobre a realidade, sen esquecerse de provocar. “Sempre tratei de provocar, busco que a xente esperte. A nova xeración precisa que lle dean algo, provocación, para que a rapazada bote a funcionar. Non che poden dar todo feito”, asegura con coñecemento dende o seu estudo en Verín.

Todos aqueles que se asomen á súa nova mostra poderán desfrutar de seguro dalgún dos seus cigarróns, un personaxe que protagoniza moitas das súas obras e que é unha constante para Rivada, que o considera o seu “deus”.

Inauguración

A inauguración de “Pensamentos Fuxidos” terá lugar o luns, 12 de maio, ás 19,30 horas. A partir de aí podera visitarse no espazo expositivo verinense de luns a venres, en horario de 9,30 a 14,30, e de 16,30 a 19,30 horas.