Verín exaltará ás cantareiras cunha semana de actos polas Letras Galegas

A vila do Támega presentou a súa programación polo Día das Letras Galegas, dedicadas este ano á cultura popular, na figura das cantareiras, e a diferenza do que viña sendo habitual, con homenaxes a persoeiros da literatura. Así, do 10 ao 18 de maio haberá unha semana de música, exposicións, palestras, teatro infantil e certames poéticos.

Samanta Barreira, concelleira de Cultura, salientou que “pomos en valor o papel fundamental das cantareiras na preservación da nosa lingua e cultura, cunha programación que combina tradición e innovación”.

Tamén fixo fincapé en visibilizar a actividade cultural do tecido asociativo feminino do territorio: “As nosas agrupacións e asociacións de mulleres rurais levan décadas mantendo viva a nosa identidade coa música, o baile, a palabra ou a solidariedade”.

A “trisca”, primeira cita

O sábado 10 haberá unha “trisca”, o termo propio da comarca para as foliadas, ás 17,00 horas na Preguiza. Un encontro de grupos e asociacións da comarca (Candaira, Silverias do Támega, As Travesas, As Torgueiras, Os Trouleiros, e diversas asociacións de mulleres rurais) que encherán o espazo de música tradicional, xogos populares e un obradoiro de baile. Ás 21 00 horas, o grupo Ailá ofrecerá un concerto que mesturará música tradicional galega coas novas sonoridades.

O luns 12, ás 19,30 horas, inaugurarase na sala de exposicións a mostra “Pensamentos Fuxidos”, do artista Xosé Rivada. O día seguinte, ás 20,00 horas, no Auditorio, haberá unha audición de conxuntos instrumentais do alumnado do Conservatorio.

O 15 de maio, ás 20,30 horas, a Casa da Cultura acollerá a palestra “Metendo as mans na terra”, do recoñecido músico e investigador Xabier Díaz, na que contará a súa experiencia nas recollidas de cancións populares e o proceso creativo de reinterpretación desa memoria sonora.

Xornada infantil

O venres, 16 de maio, terá lugar pola mañá “Os coles cantan” na praza García Barbón, onde máis de 600 cativos dos colexios Amaro Refojo e Princesa de España interpretarán cancións tradicionais. Pola tarde, na biblioteca, a compañía Galitoon Teatro presentará “Os Descontacontos”, un contacontos con monicreques.

O propio 17 de maio, ás 18,00 horas, a Casa da Cultura acollerá o teatro infantil “Castelao. Un corazón á intemperie”, de Fantoches Baj.

Finalmente, o domingo, ás 11,30 horas, no Auditorio, celebrarase a gala músico-literaria das Letras Galegas, coa entrega dos premios dos Certames de Poesía “Xosé Carlos Caneiro Pérez” e de Relato Curto “Antonio Fernández”, convocados polo Concello.