Un artista de Verín aposta por “enlatar” a música do seu novo álbum

PAPPAQUINO

Joaquín Limia "Pappaquino" (Ábedes, 1998), cantante e produtor de Verín, vén de lanzar un novo álbum coa súa música nun formato inxenioso: unha lata de conservas en edición limitada cun USB con cancións e videoclips inéditos

Nun momento en que a nivel de márketing pensamos que xa o tiñamos visto todo, o músico verinense emerxente Joaquín “Xocas” Limia, coñecido artisticamente como Pappaquino, acaba de sorprender co formato escollido para a publicación do seu novo EP (disco sinxelo) “Esta pago eu”.

Amante da pesca no río Támega da súa vila natal, o artista de Ábedes pensou en crear unha edición numerada e limitada de 100 “pinchos” USB, en forma de colgante, agochados no interior dunha lata de conservas, coma se de mexilóns ou de anchoas se tratara.

Segundo Pappaquino, a acollida desta lata-álbum está a ser “excelente”, e practicamente xa ten vendidas tódalas unidades. Aínda que non o pareza, todas están “feitas manualmente na casa, dende o enlatado ata a copia dos arquivos nos USB e o serigrafiado”, afirma o músico, que tivo a idea de “mercar as lastas e facer algo distinto”.

O pendrive non só inclúe os seus temas máis coñecidos, como “Onde tas?” ou o tributo ao Entroido de Verín “Namoreime de ti”, senón que ademais incorpora tres singles inéditos, videoclips e tomas falsas.

A lata do EP de Pappaquino contén unha rede, un colgante e o USB co álbum. | Pappaquino

Carreira en ascenso

Tras darse a coñecer no Extruga Festival de Verín do ano pasado, “Xocas”, como o coñecen os amigos, ten ante si un 2025 cheo de datas. O pasado entroido foi a estrela do Venres de Compadreo, cunha actuación na rúa Irmáns Moreno que congregou a moita xente. Este mes participou en Santiago xunto con ULEX e o limiao Kid Mount na final de novos valores do Festigal.

Por diante, actuacións en Pantón, no Extruga e en Arzúa, así como nalgúns eventos por desvelar, nos que deleitará coa súa fusión de letras en galego, música electrónica e o saxofón en directo, e sempre vestindo o pantalón do Cigarrón.

Joaquín compaxina a composición de novos temas como Pappaquino coa produción musical, baixo o selo “Cooking4theMomma”. Froito deste traballo incansable, está a piques de desvelar o seu estudo de gravación profesional, polo que xa teñen previsto pasar outros artistas ascendentes como silee.