A biblioteca de Verín acada un novo premio María Moliner "grazas" a Eloy Luis André

FOMENTO DA CULTURA

Coa edición da tese "As curvas melódicas da fala", de Eloy Luis André, o pioneiro na psicoloxía moderna en España, a biblioteca de Verín obtivo novamente o premio estatal de animación á lectura María Moliner

Vicente Justo e Aurora Prieto, responsables da biblioteca de Verín, coa obra premiada. | C.L.M.

A biblioteca pública municipal de Verín foi galardoada un ano máis co premio de animación á lectura María Moliner do Ministerio de Cultura. Na convocatoria de 2025 recibiron 2.777 euros polo proxecto “El presente del pasado: as curvas melódicas da fala”, que se plasmou na edición dun libro que recupera e divulga a esquecida tese lingüística do psicólogo e filósofo Eloy Luis André (Mourazos, 1878 – Madrid, 1935).

A obra rescata a figura dun pioneiro na investigación da psicoloxía moderna en España, e recompila e analiza o estudo orixinal de André sobre a melodía da fala nas linguas, incluída a galega, a través de fonogramas que representan graficamente o son de cada idioma.

O Concello de Vilardevós fixo posible a edición do libro, que asinan Aurora Prieto e Vicente Justo, responsables da biblioteca, e Víctor Freixanes, Patrick Feaster, Xosé Ramón García Soto e Miguel Losada, profesionais en distintos eidos.

O libro, presentado nun congreso nacional de psicoloxía en Valencia, busca “reescribir a historia da psicoloxía en España, xa que Eloy Luis André introduciu a psicoloxía moderna aquí, e o seu estudo foi o primeiro feito por un español”, afirma Vicente Justo.

Ademais, dende a biblioteca afirman ter un compromiso “co fomento, preservación e progreso da cultura, e nesa liña tentaremos continuar”.

“Referente cultural”

O vigués Pedro Feijoo, escritor best-séller e amigo da biblioteca, que colaborou con el na súa última obra, “Onde nacen as bestas”, defínea como un “referente cultural do país”.