Vilardevós coñecerá a tese lingüística pioneira de Eloy Luis André

A presentación terá lugar este sábado, ás 19,00 horas, e a obra analiza a tese realizada na Universidade de Leipzig entre 1910 e 1911 polo filósofo, pedagogo, e escritor Eloy Luis André.

O seu estudo pioneiro sobre a melodía da fala en diversas linguas, incluída a galega, plasmouse en fonogramas que representan graficamente o son de cada idioma.

Nado en Mourazos (Verín) en 1878, André criouse non obstante en Vilardevós, onde ten unha rúa ao seu nome no lugar no que se asentaba a súa vivenda familiar, que ardeu trass un incendio o pasado setembro.

A edición do libro, asinado por Aurora Prieto, Patrick Feaster, Xosé Ramón García Soto, Miguel Losada e Vicente R. Justo, foi posible grazas ao apoio do Concello de Vilardevós, que tamén organiza o acto.

Este libro, que foi presentado por vez primeira nun congreso de psicoloxía nacional en Valencia, busca “reescribir a historia da psicoloxía en España, xa que foi Eloy Luis André quen introduxo a psicoloxía moderna aquí, e o seu estudo foi o primeiro feito por un español”, asegura un dos autores, Vicente Justo, director da biblioteca de Verín.

Participantes

Na presentación intervirán o psicólogo clínico Xosé Ramón García Soto, que falará sobre “Psicoloxía: Ciencia, reforma e cambio social”; o xornalista, escritor e expresidente da RAG, Víctor Freixanes, que tratará sobre a recuperación histórica da figura de Eloy Luis André, e Vicente Justo, polo seu labor como responsable do rescate e recuperación do manuscrito orixinal.