O Festival de Curtas de Verín reflexionará sobre a “fraxilidade” da verdade

Baixo o lema “A verdade nunca foi tan fráxil”, o cartaz do FIC obra da artista Patricia Portela, de The Office Comunicación, amosa un “erro” dun sistema informático sobre a icónica man que sostén a antorcha da Estatua da Liberdade de Nova York, símbolo universal da liberdade e da verdade como luz que guía, convidando a reflexionar sobre “a erosión da verdade nunha sociedade cada vez máis sometida ao ruído dixital e á desinformación”.

“A metáfora é clara: ese sistema que debía protexer a verdade colapsa diante do bombardeo constante de falsidades”, explica a deseñadora, que engade que “a verdade, pilar fundamental de calquera sociedade libre, está a sufrir unha fonda devaluación nun mundo saturado de información e dominado polas fake news”.

Segundo Portela, esta proposta visual e textual, que destaca polo uso predominante do ton vermello, “asociado co perigo, coa alarma e coa urxencia o que intensifica a sensación de vulnerabilidade”, pretende “sacudir conciencias e chamar á reflexión sobre a importancia de preservar a verdade como ben común, como base para construír unha sociedade realmente libre”.

Desde o equipo directivo do festival sinalan que a elección desta imaxe e temática non é casual. “Celebrar dez anos non é só mirar atrás, é interpelar o presente. O FIC Vía XIV sempre defendeu o cinema como ferramenta para pensar o mundo, e nesta edición facémolo poñendo o foco no valor, hoxe máis ameazado ca nunca, da verdade”, indica Jorge Godás, responsable da área de Creatividade do festival.

Temática desta edición do FIC

As curtametraxes a concurso nesta edición xirarán arredor desta mesma temática, abrindo espazos para cuestionar, expoñer e iluminar as zonas escuras da realidade contemporánea.

Nas vindeiras semanas iranse anunciando as actividades paralelas que completarán un programa pensado para celebrar o cinema e a cultura “como ferramentas de pensamento crítico e transformación social”, sosteñen dende o FIC.