O fotógrafo Carlos Folgoso Sueiro será por fin profeta na súa terra, Verín

UNHA VISIÓN DE GALICIA

Tras ser premiada e exposta en medio mundo, a exposición fotográfica "Alén do lago" de Carlos Folgoso Sueiro poderá desfrutarse en Verín, a súa vila natal

Autorretrato do fotógrafo Carlos Folgoso Sueiro, cunha foto de “Alén do lago”. | Carlos Folgoso Sueiro

Despois de ser exposta en lugares como o museo do Hermitage de San Petersburgo, baixo a ponte de Brooklyn en Nova York, na Somerset House de Londres ou na Filmoteca de Galicia, e en cidades como París, Limasol, Santander ou Lugo, a mostra “Alén do lago” do fotógrafo verinense Carlos Folgoso Sueiro poderase desfrutar na súa vila natal a partir deste sábado.

Esta “viaxe visual e simbólica pola Galicia máis profunda”, a través de imaxes de gran forza estética e narrativa, recibiu no último ano e medio distincións como o Premio Galicia de Fotografía Contemporánea, un Sony Award, o Vital Impacts, o International Photography Award ou o Marco Pesaresi.

Para o fotógrafo, expór na casa supón “un orgullo tremendo”, e agradece a aposta “do Concello e da asociación Vía XIV”. El é o primeiro sorprendido pola “incrible acollida que está tendo esta mostra, un proxecto pausado e algo distinto no que aínda estou a traballar, e que me está abrindo moitas portas”.

Folgoso Sueiro traballou máis de dez anos como fotoxornalista en Italia e Rusia, cubrindo acontecementos como a traxedia de Lampedusa ou o relevo papal de Bieito XVI a Francisco para os xornais e as revistas máis prestixiosas do mundo.

Retrato de galicia

As fotografías desta últma mostra teñen como protagonista o noso país, cun percorrido a través de personaxes e lugares, como a aldea de Aceredo, somerxida polo encoro de Lindoso, pero tamén escenas como a Rapa das Bestas de Sabucedo.

Esta exposición fotográfica está organizada polo Concello en colaboración coa asociación Vía XIV. A concelleira de Turismo, Cultura e Festexos, Samanta Barreira, salienta que “é unha mostra máis da firme aposta do Concello de Verín polo talento local, neste caso un exemplo profesional que conseguiu proxectarse a nivel internacional sen perder o vínculo coa súa terra”.

O acto de inauguración oficial da mostra terá lugar este sábado 20, ás 20,15 horas, na sala de exposicións municipal. Intervirá o autor xunto co comisario da exposición, Mark Zlick, fotógrafo e director creativo. Ademais haberá tamén bebida e comida, cortesía da organización do evento. A partir dese día, “Alén do lago” poderase visitar ata o 31 de xaneiro, de luns a venres, de 10,30 a 14,30, e de 16,00 a 18,30.