A inesgotable factoría musical do instituto Chivite de Verín segue a pleno ritmo

AGORA ESTREA "MAMMA MIA!"

Dez anos despois de levar aos escenarios o recoñecido musical “Mamma Mia!”, o instituto Chivite de Verín reinterpretou de novo este clásico noutra exhibición da capacidade do teatro para unir a alumnado e profesorado arredor dun obxectivo común

As coreografías da nova proposta do instituto Chivite de Verín destacan polo ritmo e a paixón que amosan tódolos estudantes. | C.L.M.

Un ano máis, e xa van 13, a inesgotable canteira de intérpretes do Chivite de Verín estreou un novo musical. Os “Chivititeiros” plantáronse no escenario dun ateigado salón de actos para amosar o froito de todo un ano de ensaios e sacrificios no tempo de lecer de alumnos e profesores, unidos pola maxia que desprende o teatro.

O director do centro, César Sánchez, tomou a palabra antes de subir o telón para salientar a evolución dos musicais escolares, pero mantendo a súa finalidade: “Crear comunidade, cun proxecto de centro inclusivo, diverso e con valores”. Engadiu que os estudantes son “os verdadeiros protagonistas”, mentres que a fonte de imaxinación provén de “David (Rivada) e Isabel (Cota), os auténticos artífices”.

O elenco protagonista do “Mamma Mia!”, nunha escena nun lateral do salón. | C.L.M.

Foi o propio Rivada, autor do libreto, quen explicou que este ano o equipo debateu a posibilidade de tomar un “descanso creativo” debido ao esgotamento acumulado tras enlazar dous musicais orixinais seguidos, “Mil estrelas, musical de musicais” e “Disneyland D’eiquí”. Por sorte optaron por regresar a “Mamma Mia!”, nunha edición con numerosos cambios, cancións adaptadas ao galego por Isabel Cota, coreografías novas de Helena Pousada e Elisa Álvarez, e a colaboración da banda do Conservatorio.

ABBA como telón de fondo

Para os espectadores que xa viran o filme, este “Mamma Mia!” parte da mesma premisa, pero a acción trasládase ao Hotel Maruxa, na illa de Ons. Baixo ese pretexto, estudantes de ESO e Bacharelato actúan, cantan e bailan durante dúas horas ao son dos clásicos de ABBA, acompañados polo coro de mestres e alumnos, e con Rivada ao piano. Ademais, non falta ningún dos sinais de identidade das producións do Chivite, como son as numerosas referencias á comarca de Monterrei e outras adaptacións culturais cheas de retranca, xunto a unha constante rotura da cuarta parede.

O coro do Chivit e o imprescindible acompañamento ao piano de David Rivada. | C.L.M.

Subidos sobre o escenario, tódolos alumnos participantes brillaron por igual e tiveron a oportunidade de amosar o seu talento innato coa excusa desta obra coral. O público vibrou con eles e desfrutou dunha nova mostra da capacidade transformadora e evasora do teatro, por moi estudiantil que sexa. Trala dobre sesión no instituto, o Chivite aínda ten por diante dúas sesións no auditorio, este venres e sábado, ás 20,30 horas. E tras esta semana comezarán a cargar as pilas para o ano que vén, no que xa avanzan que… “The Show Must Go On”.