O PP destaca en Cabreiroá as axudas da Xunta aos montes comunais

Os parlamentarios populares Víctor Baladrón e José Luís Ferro visitaron onte a comunidade de montes mancomunados de Cabreiroá (Verín) co seu presidente, Manuel Sanmamed, para recoller as demandas dos comuneiros, trasladar o seu apoio pola vaga de lumes e detallar axudas da Xunta para recuperar no posible o que perderon.

O monte de Cabreiroá, coñecido como O Pozo do Demo, é un dos espazos naturais singulares e emblemáticos de Verín “que lamentablemente se viu afectado de maneira notable polos incendios forestais”, indicou Víctor Baladrón, quen recoñeceu “o esforzo levado a cabo polos veciños na súa protección”.

Lembraron que a Xunta ofrece liñas de apoio para as comunidades de montes, con fin de recuperar as infraestruturas forestais dañadas, para a restauración ambiental e repoboación con especies autóctonas, para traballos de prevención e mellora do mosaico forestal e para o apoio á xestión forestal activa.