Verín prepárase para vivir dous días de cervexa e música

O Concello de Verín celebra este venres e sábado a V edición da Festa da Cervexa, un evento centrado nesta popular bebida que ofrecerá máis dunha vintena de variedades de cervexas nacionais e de importación, e que se complementará con postos cunha variada selección gastronómica e música en directo.

A feira celebrarase na zona verde da Preguiza, nunha carpa que acollerá os postos de bebidas e alimentación en horario de 18,00 a 02,00 horas ámbolos dous días.

O concelleiro de Feiras, Transporte e Xuventude, Manuel Lorenzo, asegura que esta festa é xa unha das citas de referencia no calendario de outono da vila do Támega, tras reunir na pasada edición a máis de 5.000 asistentes. “Este ano queremos manter ese nivel de participación con propostas para tódolos gustos”, sinalou.

A nivel gastronómico, Lorenzo destacou que “haberá uun total de 12 postos, 10 no interior e dous no exterior, cunha oferta variada pensada para acompañar a cervexa: dende propostas clásicas como chourizos ou salchichas, ata elaboracións como hamburguesas, polbo, codillo empanadas ou gofres e crepes caseiros”.

Concertos

A cita cervexeira contará tamén con animación musical en directo no interior da carpa, cun programa preparado pola área de Turismo, Cultura e Festexos do Concello que lidera a concelleira Samanta Barreira. O venres, ás 00:00 hroas, terá lugar a actuación de Los Tresillos, un trío compostelán de versións de power pop-rock.

O sábado, tamén ás 00:00 horas, será a quenda da agrupación En Mala Hora Rock & Roll Band, unha agrupación musical ourensá que versiona tanto temas coñecidos como pequenas xoias esquecidas.