Un nadal artesano e solidario en Caldelas

Castro Caldelas dará inicio á celebración do seu nadal artesano e solidario, un evento que según explica a súa alcaldesa Sara Inés Vega, promete encher de maxia e tradición as rúas da localidade desde este sábado, a partir das 17,00 horas. Unha decoración feita a ganchillo, deseñada e organizada pola Asociación de Xubilados, cuxa inauguración contará cunha serie de actividades que resaltan a artesanía local e a solidariedade veciñal.

A tarde comezará coa descuberta da árbore de ganchillo no adro do Santuario dos Remedios, unha impresionante obra que simboliza o esforzo e a creatividade dos artesáns locais. Os adornos colgantes que decoran as árbores do parque tamén darán un toque á ambientación da vila, creando un entorno festivo.

Os asistentes poderán desfrutar dun paseo pola iluminación da Praza do Prado, e emprender o camiño ata o castelo, onde se atopan os 7 ananos gardiáns do castelo feitos tamén artesanalmente. Neste lugar emblemático, a decoración vexetal e as bolas de luz de ganchillo engadirán un toque de maxia ao ambiente.

A música será unha parte da celebración, co concerto “Alalás e Cantigas do camiño de Santiago” da cantante Uxía, Sergio Tannus e Germán Díaz, ás 18,30 horas na sala nobre do castelo. Para rematar a xornada de inauguración do nadal, os asistentes están convidados a unha merenda no local multiusos de Os Pilos.