Galería | Astariz festexou San Xoán cunha sardiñada

A veciñanza de Astariz, Concello de Castrelo de Miño, retomou a celebración da festa de San Xoán cunha cea popular no centro social da localidade, lugar onde se reuniron máis de 50 asistentes para desfrutar dunha noite de festa, ledicia, amenas conversas e reencontros.

Pola tarde, cativos e maiores xuntáronse para recoller pola contorna as tradicionais herbas de San Xoán e facer ramos para colgar nas portas das casas e espantar os malos espíritus. A continuación, uns expertos cociñeiros elaboraron un menú a base de sardiñas, pan de millo, empanada e viño do Ribeiro. Rematada a cea, bailaron e saltaron a cacharela.