Vilar de Santos e Xunta compartirán proxectos

O novo alcalde de Vilar de Santos, Rubén Colmenero, que tomou o poder o pasado mes de febreiro, reuniuse onte a mañá con Manuel Pardo, delegado territorial da Xunta en Ourense. Foi a primeira reunión oficial entre os organismos dende que Colmenero asumiu o cargo, e serviu para analizar as principais demandas do municipio en relación á Administración autonómica.

Nesta reunión volvéronse a abrir as liñas de conversación establecidas polos anteriores gobernos e retomáronse temas pendentes, ademais de achegar novas ideas que en breve se converterán en proxectos para seguir mellorando os servizos do Concello. Manuel Pardo, logo de repasar estes asuntos de interese mutuo e avaliar as posibles vías de colaboración, trasladoulle “o compromiso da Xunta de acometer os investimentos necesarios e traballar de forma conxunta”.

“Tiñamos pendente revisar a estrada principal, a Ou-531, xa temos un tramo bastante longo no que deberíamos controlar a velocidade”, puxo como exemplo o alcalde, e engadiu que hai outros temas pendentes tratándose cas Consellerías implicadas.