“Coma un can”, o novo sinxelo de Kid Mount

Kid Mount, tamén coñecido como “o neno do monte”, é un artista de Xinzo de Limia que reside en Santiago de Compostela. É un artista que procura reivindicar unha estética urbana en galego con identidade propia e en constante cambio. Vén de lanzar o seu último sinxelo, “Coma un can”, que forma parte do seu novo EP “NeoAmor”, que estreará proximamente.

Nesta canción de “neoperreo” en galego, o artista limiao aposta pola desinhibición, o desexo e a liberdade. O artista mergúllase nun universo onde o amor deixa de ser idealización para converterse en instinto, nunha exaltación da entrega sen medida, da liberdade sen filtros e do pracer sen culpa.

O videoclip, filmado nas rúas de Santiago de Compostela, mostra ó artista percorrendo a cidade “coma un can”. É un relato visual con estética crúa e nostálxica, evocando á linguaxe visual dos vídeos da escena urbana noventeira. É unha idea orixinal de Vera Moreno, Jairo Moreno e Inma Veiga.