O Esquecemento solidarizouse cos afectados pola vaga de incendios

A Festa do Esquecemento anunciou antes da celebración que doaría integramente a recadación do posto de merchandising ó Concello de Cualedro, que se viu especialmente afectado pola vaga de incendios que arrasou a provincia ó longo deste mes.

A Asociación Cultural Civitas Limicorum, organizadora da Festa do Esquecemento, fixo pública a transferencia feita esta semana ó Concello de Cualedro. “Un xesto colectivo que converterá cada recordo da festa nun apoio real ás zonas da Limia e da provincia de Ourense que sufriron con dureza a vaga de incendios”, comunicaron dende a asociación, confirmando o donativo de máis de 1.000 euros para paliar os efectos dos incendios.

A XXV Festa do Esquecemento “demostrou que é algo máis ca unha recreación histórica: é tamén unha expresión de solidariedade e compromiso coa nosa terra”, comunicaron polas súas redes sociais, facendo fincapé en que “Este 25 aniversario quedará tamén gravado como o máis solidario da nosa historia. Porque celebrar é tamén axudar, e porque a forza do Esquecemento nace da unión da súa xente”.