A Feira ProLimia comezou cos premios “Merca no teu comercio”

Comercio Local

A Feira do Comercio ProLimia inaugurou onte a súa sexta edición co acto institucional así como a entrega dos premios da campaña “Merca no teu comercio”, organizada pola Federación de Comercio de Ourense, a Federación Galega de Comercio e a Xunta de Galicia.

Os gañadores dos premios “Merca no teu comercio”. | Iago Cortón

O acto inaugural tivo lugar pola mañá, no que participaron o alcalde de Xinzo, Amador Díaz; o director xeral de Comercio e Consumo da Xunta de Galicia, Gabriel Alén; a xerente do Inorde , Emma González; así como alcaldes e alcaldesas da comarca, membros da corporación local e a directiva de ProLimia, encabezada pola súa nova presidenta, Sonia Villamarín.

Acompañados pola Agrupación Musical da Limia, os asistentes percorreron os diferentes postos, falando cos comerciantes e pondo en valor esta iniciativa que procura potenciar o comercio local e de proximidade.

Pola tarde, tivo lugar a entrega dos premios “Merca no teu comercio”, sumando un total de 1.000 euros repartidos en 20 tarxetas de 50 euros para mercar no comercio local. No acto participaron Beatriz Gómez Valcárcel, presidenta da Federación de Comercio de Ourense xunto con Amador Díaz e Gabriel Alén.

Centos de veciños achegáronse ó longo do día para desfrutar desta primeira xornada. A feira celébrase ó longo desta fin de semana, na que non só haberá postos, senón tamén actividades infantís, sesións vermú e obradoiros no Pavillón dos Deportes de Xinzo de Limia e nas súas inmediacións.