Festas históricas compartiron desfile en Xinzo

A tarde deste sábado Xinzo de Limia converteuse nunha liña do tempo viva, coa celebración do gran desfile da Asemblea Anual da Asociación Española de Festas e Recreacións Históricas (AEFRH). Máis de 200 persoas procedentes de diferentes puntos do Estado desfilaron ataviadas con indumentarias representativas de tódalas épocas históricas, desde a Idade do Bronce, pasando polo mundo romano, a Idade Media, o Renacemento, ou o Barroco, ata chegar á época contemporánea.

O desfile arrancou ás 20,00 horas, tras esperar ata o último momento o cesamento da choiva, desde o Mugae (Museo Galego do Entroido) e percorreu as rúas centrais de Xinzo ata a estación de autobuses, ofrecendo ao público unha espectacular mostra de diversidade histórica, rigor na recreación e paixón polo patrimonio.

Este acto converteuse nun dos momentos máis simbólicos da fin de semana, servindo como escaparate do traballo que realizan as festas históricas de todo o país e como celebración compartida das raíces culturais que unen territorios e xeracións.

A organización corre a cargo da A.C. Civitas Limicorum e da AEFRH, coa colaboración do Concello de Xinzo de Limia e da Xunta de Galicia, a través de Turismo de Galicia. O evento celébrase coincidindo co 25º aniversario tanto da entidade anfitrioa como da propia asociación estatal. Xinzo vive así unha fin de semana histórica en todos os sentidos: con hoteis ao completo, rúas cheas de vida e un ambiente que demostra que a historia, cando se vive con paixón e respecto, segue máis viva ca nunca.

As 40 delegacións españolas asistiron o venres a unha recepción na Casa do Concello.