A obra da N-525 en Xinzo de Limia encara a seguinte fase

A Corporación Municipal do Concello de Xinzo recibiu onte pola mañá ao subdelegado do Goberno en Ourense, Eladio Santos, ao carón da Nacional 525, para supervisar o avance das obras de humanización ao seu paso pola vila. Contan cun prazo de execución de 12 meses e cun orzamento superior aos catro millóns de euros, achegados polo Ministerio de Transportes mediante fondos NextGenerationEU.

Na visita prestouse atención a un dos tramos en execución nesta primeira fase, que atende as avenidas de Ourense e Madrid que contarán con beirarrúas máis anchas, itinerarios peonís e ciclistas, mellora de interseccións con pasos seguros e novas rotondas, renovación e soterramento de servizos, novo alumeado e zonas verdes.

O alcalde, Amador Díaz, apuntou que a obra “estase a executar en coordinación co Concello para compatibilizar os traballos coa vida da vila”. Ramón Gómez, concelleiro de obras, explicou que “a obra transcorre con moita axilidade e implicación, mirando sempre polos intereses dos veciños”.

O subdelegado do Goberno explicou que estes traballos son “exemplo da gran transformación da mobilidade”, ao que a voceira socialista, Elvira Lama, engadiu que esta obra é “transformadora dende o punto de vista urbanístico, da mobilidade e sostibilidade”, facendo fincapé en que “paga a pena estar a fronte dun goberno municipal cando se conseguen cousas así”.