Pais da Limia critican a desatención oftalmolóxica

O Centro de Saúde de Xinzo de Limia volve ser obxecto de reclamacións por parte dos pais e nais da comarca limiá. A Plataforma de Loita Pediátrica da Limia critica a “desatención que sofren actual e sistematicamente os seus fillos e fillas na especialidade oftalmolóxica”.

Segundo afirman dende a Plataforma, a actualización na gradación de lentes, ordinariamente anual, “non se pode facer nos prazos indicados” e as revisións de seguimento e evolución mensuais recomendadas “non se poden celebrar en menos de tres meses”.

Os pais e nais afirman que esta espera é “inasumible” para as familias, “ao estar en xogo a visión de nenos e nenas de poucos anos”. Noela Moreiro, voceira da Plataforma, explica que afecta “ó rendemento escolar ou a relación con grupo de iguais”.

Sonia é unha destas nais que vive a situación coa súa filla: “O pediatra remitiunos á óptica para facer unha primeira criba, ‘pola gran demora nas listas”, facendo a suxestión de acudir á sanidade privada. “En xuño levei á nena á privada, porque xa levábamos meses agardando e en setembro comezaba as clases”.

“Chamáronnos este mes do oftalmólogo, levabamos esperando sete meses”, aclarou Sonia, e que o oftalmólogo “díxonos que cumpría ver a nena de xeito regular”, cousa que é “imposible”, segundo lle confirman ao pedir a seguinte cita.

Os pais e nais da Limia solicitan que as citas se ofrezan en función das necesidades e patoloxías dos pacientes e non das listas de espera. Dende a Plataforma inciden en que “esta estratexia de desprestixio dos servizos públicos empurra ás familias ós servizos privados ante a imposibilidade de agardar os devanditos prazos”.

Sanidade

Dende a Área Sanitaria de Ourense, Verín e Valdeorras apuntan que comprenden e comparten “a preocupación das familias da Limia. A detección temperá dos problemas de visión é fundamental para o desenvolvemento dos nenos e nenas, e somos plenamente conscientes”. Explican que “desde o Servizo de Oftalmoloxía se están a aplicar medidas para mellorar a atención: revisando os circuítos de derivación desde Atención Primaria, para priorizar os casos preferentes así como ampliar a actividade asistencial con consultas de tarde e axendas específicas para Pediatría”.

Tamén se reafirman en que, “como quedou recollido nos últimos datos de tempos medios de demora, estes melloraron significativamente, non si, este é un proceso continuo e seguiremos traballando para reducir os tempos de espera e ofrecer a mellor atención posible aos pacientes máis novos”.