O Patapas reparte 3.000 euros para mercar no comercio local

O concurso Patapas, organizado polo concello de Xinzo en colaboración coa hostalaría local, celebrou onte o sorteo final desta edición 2025, onde ademais de repartir 3.000 euros en 25 vales de compra para o comercio local, déronse a coñecer os establecementos mellor valorados polo público. Os veciños gañadores recibiron unha chamada do alcalde, Amador Díaz, e o concelleiro de Promoción Económica, Ricardo Sieiro, para citalos no Concello e facerlles entrega dos vales, que se poderán canxear ata o 31 de decembro.

Os edís deron a coñecer os gañadores desta edición, na que o bar Monforte se coronou grazas a que preto do 80% dos consumidores incluiron a súa tapa entre as favoritas. O segundo posto foi para La Central Heladera, e o bronce para o bar Rosalía.