Quince anos de Coralimia

Música tradicional galega

O Coro Aimil celebra hoxe a XV edición do festival Coralimia, que logo de quince anos é unha das citas máis recoñecidas entre os coros de música tradicional galega, pero o seu percorrido comezou fai máis de 20 anos coma unha asociación.

Fernando Dopico, Lola Ojea, Lina Gómez e Mari Villarino. | B.L.

Xinzo de Limia é unha vila profundamente ligada á música, xa que conta con diversas agrupacións de diferentes xéneros cun percorrido sonado. Entre elas está o Coro Aimil, que naceu fai máis de vinte anos coma unha asociación, Aimil Folc, formada por membros e pais de alumnos da Escola Municipal de Gaitas e Percusión de Xinzo, para axudar aos rapaces en asuntos aos que non chegaba o Concello.

Nunha reunión da asociación polo 2003, o que logo sería -e sigue sendo- director, Fernando Dopico, xunto co concelleiro de Cultura, Suso Losada, propuxéronlles aos pais reunirse para cantar, “xa que en Xinzo sempre houbo moita tradición de cantar nas tabernas e por aí”, explicou Lina Gómez, unha das voces que leva no coro dende a súa fundación. “Non era só por cantar, senón tamén para recuperar as cancións tradicionais e populares e non perdelas”.

“Nós animámonos pensando que íamos ir cantando polas tabernas e que cada un ía cantar o que lle petase, pero ao chegar aquí a cousa cambiou e tornouse moi seria”, explicou Lina entre risas, “non tiñamos nin idea, cantamos de oído ao non saber música, e estivemos ca primeira canción un ano”.

O coro foi crecendo cos anos, e pouco a pouco fóronse sumando outras voces que xa non tiñan que ver cos cativos da escola, “simplemente xente á que lle gusta cantar, máis que hoxe non fomos nunca”, afirmou Lina.

O director explicou que as primeiras actuacións foron na casa, “a primeira vez que fomos fora -dixo con sorna-, foi a Allariz”.

Moitos dos membros do Coro Aimil, que hoxe actuarán na XV edición do Coralimia. | B.L.

As oportunidades leváronos a outros festivais e a máis localidades, xuntándoos con coros de música galega de gran relevancia coma Toxos e Froles de Ferrol, a Coral De Ruada de Ourense ou o coro coruñés Cantigas da Terra.

Un dos selos de identidade do Coro Aimil é o festival Coralimia, que celebrará hoxe a súa XV edición na Igrexa Vella de Xinzo de Limia. Esta idea naceu polo ano 2008 e materializouse coa celebración da primeira edición en 2010, que ó longo dos anos foi gañando sona. Este percorrido valeulle ao coro para ser recoñecidos con diferentes galardóns e méritos, entre os que se atopan o premio da Cultura de Xinzo de Limia ou o premio Xavier Prado Lameiro que recibiron en 2024.

XV Coralimia

A cita de hoxe dará comezo ás 20,00 horas, e contará coa participación do coro Aires de Bergantiños de Carballo. Esta edición é especial xa que ao non poder actuar a Banda de Gaitas, recurriuse “á vella garda dos gaiteiros de Xinzo”, explicou Fernando, “os mesmos que comezaron a tocar co coro fai case 25 anos”. Ademais, o Concello farálle entrega ao coro dun agasallo, unha bandeira co logo da agrupación e da asociación da que se colgaran as “gravatas” cos seus recoñecementos.