Xinzo énchese de cantigas polas Letras Galegas

Os alumnos do IES Lagoa de Antela e do IES Cidade de Antioquía participaron onte pola mañá na Foliada das Letras, que tivo lugar na Praza Maior de Xinzo.

O proxecto comezou “ó saber que este ano o Día das Letras Galegas estaría dedicado ás cantareiras”, explicou a profesora María Dolores Cid, que tamén é coordinadora do Equipo de Dinamización da Lingua Galega no IES Lagoa de Antela.

Os alumnos recolleron cantigas, non só das súas familias, senón que tamén se achegaron ó centro de día. Para difundir esta recompilación, prepararon uns vinilos, que se pegaron por diferentes establecementos da vila. Teñen un código QR incluído para poder escoitalas directamente das informantes. Convidaron a Matilde, veciña de San Pedro de Laroá, que foi unha das informantes, para que participase na foliada.