Xinzo de Limia comezará a protexer as colonias felinas

O Concello de Xinzo de Limia publicou o novo protocolo de xestión de colonias felinas. Esta medida foi aprobada no último pleno por unanimidade. Nesta nova acta regúlase unha serie de servizos para os que se intentará acadar convenios de colaboración con administracións públicas de maior tamaño para tratar de xestionalas de xeito máis completo que coas limitacións orzamentarias que sufre o Concello de Xinzo de Limia.

Neste protocolo recóllense medidas para protexer aos gatos rueiros da vila, aplicando a lexislación vixente sobre malos tratos animais e na normativa para a protección de animais. Ademais dun proceso de documentación, control e censo municipal das colonias felinas e sinalar onde se atopan. Este traballo farase a través de voluntarios e asociacións protectoras de animais, que dende o concello favorecerán e protexerán a súa labor e poderán ser acreditadas dun carné ou xustificante da actividade de protección e coidado logo de atender un curso.

Tamén se procurará fomentar convenios de colaboración coas clínicas veterinarias do municipio e as asociacións protectoras da provincia para efectuar, de xeito progresivo, o método CES (Captura-esterilización-solta) en Xinzo. Finalmente, tamén se realizarán talleres de educación contra o abandono e os malos tratos animais, alén de campañas que conciencien da esterilización dos animais domésticos.

Labor altruista

Este proxecto apóiase no labor altruísta dos veciños, colectivos e asociacións de Xinzo de Limia que desexen colaborar co proxecto, ademais dos veterinarios, quen xunto co Concello traballarán pola protección animal, na que se realizará unha primeira avaliación da zona e dos lugares onde se atopan os animais, número de exemplares existentes e valoración da situación. Logo levarase a cabo o acondicionamento do lugar de localización da colonia: retirada de lixo acumulado como consecuencia directa da colonia e habilitación das zonas de alimentación e acubillo.

Os colaboradores autorizados procederán a capturar os gatos da colonia asinada, seguindo as pautas e métodos de captura que se lle indiquen e sempre de maneira coordinada cos veterinarios colaboradores. Os veterinarios logo encargaranse de facer unha avaliación previa do animal, acompañada dun proceso de desparasitación interna e esterilización cirúrxica. Tamén procederán a marcar estes felinos e identificalos.