Xinzo vive unha xornada deportiva enxebre nas IV Olimpíadas Rurais

XOGOS POPULARES

As IV Olimpíadas Rurais de Xinzo de Limia compuxeron un ano máis un día de conviencia e diversión cos deportes de sempre como telón de fondo

O lanzamento de sacho, un dos clásicos das Olimpíadas Rurais. | Iago Cortón

Un total de seis equipos (Vilar de Covelas, Aldea de Saa, Polígono, Limiaos Rurais, Limia Warriors e Barrio de Abaixo), cun total de 65 integrantes, déronse cita este sábado no campo de fútbol da Moreira con motivo da celebración da IV edición das Olimpíadas Rurais Interpobos.

Ao longo da xornada, as formacións mixtas dirimiron o seu talento nun total de 12 actividades: triatlón, billarda/cachizo, lanzamento de sacho, birlos celtas cegos, turra-sedeño, carreira de relevos, tute, pano, chave, brilé, vintos e loita galega.

Polígono foi un dos coloridos equipos participantes na xornada. | Iago Cortón

Este evento sociodeportivo de convivencia e posta en valor dos xogos e prácticas deportivas tradicionais coroou este ano como campións a Vila de Covelas.

Aldara Cuquejo, do colectivo RAS, organizadores das olimpíadas coa colaboración do Concello e do CDR O Viso, fai unha valoración “moi positiva malia o calor” do día, que arrancou “co triatlón e pechou coa loita galega, que foi sen dúbida o xogo estrela do día”.