Viaxe a Helsinki para importar boas prácticas docentes

Beatriz Nieto, profesora do colexio Padre Feijoo-Zorelle, está estes días na capital de Finlandia para participar nun evento formativo dirixido a profesores de centros educativos de toda Europa. Ao longo de cinco días, Beatriz terá a oportunidade de visitar as escolas de Helsinki nas que observará clases reais para analizar o enfoque pedagóxico e importar boas prácticas docentes. Ademais, entrevistarase con docentes de cada centro para intercambiar información sobre a realidade educativa e sociocultural de Finlandia e do noso país, para sentar as bases de futuros proxectos de colaboración.

Este evento formativo en Helsinki constitúe a 6ª das 7 mobilidades do proxecto Erasmus + K1 que o colexio Padre Feijoo Zorelle puxo en marcha o pasado 6 de setembro, "La educación inclusiva para una escuela del siglo XXI".