“Levámolo facendo 12 anos por amor ó arte”

O Tangaraño Cultural de Sobradelo, unha aldea de Xunqueira de Ambía que ten apenas 20 veciños, celebra este ano a súa 12ª edición. Esta cita, que se celebrará o vindeiro sábado 31 de maio, achega unha alternativa cultural ó rural, que este ano mestura música, poesía, gastronomía e humor. Tamén realizan actividades populares e obradoiros ó longo do día.

Está organizado pola Asociación Cultural homónima, que en realidade é unha soa persoa, Rochi Nóvoa. Para sacar adiante este evento, que “ten moitísimo traballo que non se vé”, e que require de “meses de organización e de pedir favores, de que che devolvan favores”, Rochi conta ca axuda de “os meus fillos que me botan unha man, o meu home e as miñas irmás”.

O evento naceu da “inquedanza” dos veciños, que non coñecían outras cousas que non fose o habitual, “é difícil achegar á xente todo o que non sexa unha charanga ou unha orquestra, como o teatro ou a poesía”, explicou Rochi.

“Empezou sendo unha reunión, que pretendía xuntar ós meus colegas e que os meus pais viran o que eu andaba facendo por aí cando non viña para a casa”, dixo a organizadora, “pretendíamos tocar, recitar e comer todos xuntos, pero a idea gustou bastante e animouse moita xente”, aclarou, “tivemos que pasar dunha reunión de amigos a unha xuntanza pública”.

Con esta xuntanza, a asociación intenta “achegar algo diferente para enriquecer a vida no pobo”, e segundo comenta Rochi, “levamos realizando este tangaraño doce anos por amor ó arte, e nunca mellor dito”.

“Todo o que propomos sae adiante, e cando pregunto quen quere vir ó día seguinte temos as horas completas”, explicou Rochi respecto á selección de artistas.

Os artistas invitados tamén asisten de balde, e Rochi explica que o Tangaraño non se fai “para gañar cartos”, senón que o evento “é unha lanzadeira” para os participantes. A cita é de balde, conta con comida a prezos populares e o público “vén entregado”.

Para afrontar os gastos que supón a infraestrutura e o pago dos seguros necesarios, a asociación non recibe “cartos de ninguén”, senón que os recadan a través da tómbola. Os establecementos locais adoitan sortear experiencias ou produtos.