Nas dianas dun campo de tiro vense as sinais do tirador, a súa habilidade, o seu nivel de especialista. Así as de Jorge Encinas Arnau, como nos ten afeito dende antes dos Xogos Olímpicos de Barcelona 1992, competición para a que fora preseleccionado.
A que escolle Iago Eireos para a portada do seu catálogo da exposición, ten puntuacións de nove a nove e medio, unha do grupo de fotogravados reelaborados dende a diana de papel, que este artista lucense presenta en Ourense no centro cultural da Deputación. Elas falan do pulso, respiración e vista, e ademais e sobre todo dun control mental: son unhas pezas precisas que reflicten unha mente minuciosa e ordenada por tras. Son o campo de probas de Nación S.A, proxecto de amplo espectro que ten formato de autor, un ensaio de recapitulación do seu camiño andado, e as experiencias enxergadas na travesía. Anda o artista nese punto vital de idade que ben a ser o da primeira madurez, logo de terse movido por diferentes espazos do noso Estado, reino que ten percorrido, dende o seu espírito inquedo e a súa arte, polos territorios de León e Valladolid, Alcalá de Henares, Móstoles e Madrid, Zaragoza, Murcia, o museo provincial de Lugo, cidade na que naceu vai para trinta e sete años.
E nese tempo o Premio Art & Environement Montalbano (Italia), e diversas bolsas artísticas de residencia coas que foi por España, Portugal, Italia e Romanía, incluso. Foi "On the road projet" por Europa, co novelista Jack Kerouac na idea, e pasou logo á memoria da paisaxe engadida, unhas vivencias que enfían esta mostra. Logo de rematar a súa formación na Universidade de Vigo en 2008, completouna na EASD.RF con ciclos superiores de fotografía artística, gravado e estampación. Con todo elo formula Eireos unha proposta de identidade individual para este mundo europeo supranacional. "Seis Raíñas", en tinta e papel fotográfico, son a referencia figurativa de autoridade. Na parede de enfronte hai trinta e tres "sombras" unha morea de acaídas siluetas. Velaquí a idea moral da elite dende o desenfoque e a masa anónima do pobo agachada baixo liñas e grisalla.
"As Cartas sobre liño", as cartografías, unha en caixas retroiluminadas, a outra un políptico en papel sobre madeira, son imaxes polícromas e abstractas coas que amosan un territorio por definir, mapas mentais do corazón. A paisaxe como interpretación do territorio vivido. É así xurde o símbolo: as cores sólidas de pintura esmaltada para o xerador de bandeiras, Standard-te, en fiestras corredizas de aluminio... Todos os elementos da paisaxe, memoria colectiva dun territorio, coa panoplia multidisciplinar de Eireos, para unha lectura transversal. Velaquí o valor do vizoso carro de combate colocado en diagonal, instalación a partires dun carro de bois tuneado de cor marela para convertelo nun tiracoios xigantesco, máquina de fronteira e conflito... Como outro Jasper Johns (1930, EE.UU) o pintor pop das dianas e bandeiras, comprometido coas relacións entre ver e coñecer, ver e dicir, ver e crer,
A oportunidade para repensar coa arte unha proposta de Nación Anónima, un proxecto de ensaio.
