Xornada sobre Veigas de Camba, a aldea que cubriu o encoro das Portas

"MEMORIA ASOLAGADA"

A aldea Veigas de Camba, asolagada a raíz da construción do encoro das Portas, centra unha xornada do Consello da Cultura Galega na Gudiña

Vista da aldea de Veigas de Camba (Vilariño de Conso) e do val do río Camba, o 6 de setembro de 1957. | Pepe Simón

O encoro das Portas, o máis alto do país, con 141 metros, e o segundo máis grande en capacidade tralo de Belesar, foi un dos últimos da ditadura franquista.

Construído entre 1973 e 1974 por máis de 4.000 traballadores, a súa posta en marcha asolagou 1183 ha, e con elas a aldea de Veigas de Camba (Vilariño de Conso), cubrindo coa agua a súa memoria, o patrimonio e o territorio do val do río Camba, que abrangue parte dos concellos de Castrelo do Val, Vilariño de Conso, Viana do Bolo e A Gudiña.

Os últimos veciños deixaron a aldea en febreiro de 1974, pero a súa ligazón coa terra fai que cada 7 de setembro sigan celebrando cunha romaría o día do patrón, San Martiño, na Venda da Capela, na Serra Seca.

Coincidindo coa romaría deste ano e co fin de dar a coñecer esta historia, o Consello da Cultura Galega organiza este domingo, 7 de setembro, a xornada “A memoria asolagada: Veigas de Camba e A Lama no encoro das Portas”, cunha visita guiada, relatorios e unha mesa redonda.

A visita guiada pola Serra Seca partirá ás 11,00 horas do hotel Bruma, na Gudiña, e dará a coñecer as paisaxes, o encoro das Portas e a localización asolagada da aldea de Veigas de Camba.

Melisa Macía, alcaldesa de Vilariño de Conso, inaugurará un panel informativo que se colocará na Serra Seca, coa situación precisa e información xeral de Veigas de Camba dentro do encoro das Portas. O roteiro chegará ao mediodía á romaría.

Xa pola tarde, haberá tres relatorios: “O encoro das Portas: a auga que asolagou Veigas de Camba para producir electricidade”, por José María López; “O patrimonio cultural asolagado no encoro das Portas”, por Nieves Amado, e “Apuntes sobre o proceso xudicial de Veigas de Camba e algunhas propostas para o futuro”, por Fernando Serrulla.

A xornada rematará cunha mesa da memoria con veciños, moderada por Carlos Xabier Ares.