O GDR Limia-Arnoia aposta pola pataca galega

O GDR Limia-Arnoia participará no vindeiro mes de xuño no proxecto “Rural-mente”, no que tamén participan os GDR Valle de Ambroz, en Cáceres, e o GDR Galicia Suroeste, que se encargará de coordinalo.

Esta iniciativa ten como obxectivo o intercambio de coñecementos e a innovación entre as diferentes rexións participantes. Conta cunha financiación de máis de 200.000 euros procedentes do Feader.

A través de diversas xornadas técnicas, seminarios e visitas de campo, procurarán divulgar coñecementos tecnolóxicos e de xestión das Indicacións Xeográficas Protexidas (IXP) e das Denominacións de Orixe Protexidas (DOP).

Os participantes do proxecto centrarán o seu traballo nun produto concreto, de gran importancia para o desenvolvemento do seu territorio, para combinalos nestas actividades nas que se realizarán intercambios de coñecementos e posta en valor do produto seleccionado.

IXP Pataca de Galicia

O GDR Limia-Arnoia centrará os seus esforzos en incrementar a produción e o número de entidades produtoras dentro da IXP Pataca de Galicia. Durante 15 meses procurarán mellorar a competitividade, a sostibilidade e a innovación.