O GDR Limia-Arnoia traballa na recuperación do bosque mixto atlántico

A sesión ordinaria semanal da Xunta de Goberno da Deputación, celebrada onte pola mañá, vén de aprobar unha axuda de 78.000 euros para o GDR Limia-Arnoia para o desenvolvemento do seu proxecto Mixturando, unha iniciativa que busca novos modelos de xestión territorial sobre o monte veciñal e de utilidade pública de bosque mixto atlántico.

Agora, Mixturando busca previr os incendios con 18 modelos de xestión sobre monte veciñal e de utilidade pública de bosque mixto atlántico das provincias de Asturias, Ourense e Pontevedra. Nel participan os GDRs Limia-Arnoia, Terra e Auga e Camín Real de la Mesa, xunto ao grupo PROePLA do Campos Terra da Universidade de Santiago. Estes modelos de xestión atenden a micoloxía, gandería extensiva, rexeneración de pastos, apicultura e cultivos de oliveiras, centeo e castañas en nove concellos destes territorios.

Na provincia de Ourense actúan nos Concellos de Lobeira, Muíños e Entrimo, ademais do Parque Natural Baixa Limia – Serra do Xurés e na reserva da biosfera homónima. Aquí, levanse adiante modelos forestais de recuperación de masas frondosas, por exemplo a silvicultura de bosque mixto con dominancia de cerquiño en zonas de A Pereira, en Entrimo, e Calvelo, en Muíños. Ademais, trabállase na recuperación e ampliación dunha masa mixta de carballos e bidueiros en montes veciñais de Lobeira e Gaiás, no Concello de Lobeira; a recuperación dunha masa na comunidade de montes de Río Caldo, en Lobios e a recuperación dunha masa de castiñeiros en San Paio de Araúxo, tamén en Lobios.

Estas accións compleméntanse con modelos silvopastorais de gandería extensiva e recuperación de pastos.