Instan á creación en Xinzo de Limia dunha proba ciclista dedicada a Carlos Canal

Vila propón a organización dunha “proba popular que poña en valor a irmandade da nosa terra coa bicicleta e que honre ao veciño deportista Carlos Canal”.

Así, o BNG defenderá no próximo Pleno a “idoneidade da celebración dunha proba popular que mobilice á poboación local, e que se celebre baixo o nome de Carlos Canal como merecido homenaxe” ao deportista local.

Esta moción ten que ver con feito de que a pasada fin de semana a capital da Limia foi escenario da chegada da 3º etapa da proba ciclista Volta a Galicia, que contou asimesmo coa presenza do limián Carlos Canal, ciclista do Movistar, na entrega de premios.

O BNG limiao defende a bicicleta coma “unha oportunidade de futuro” e lamenta que “teña sido discriminada dende o Concello, facendo desaparecer, por exemplo, o tradicional ‘Día da bici’, que agora queren recuperar”.

O partido nacionalista considera que é un medio de transporte “perfecto” para a vila e as aldeas, para o que “cómpren infraestruturas que o permitan”.

Camilo Vila ademais considera que Xinzo ten os ingredientes perfectos para que a idea sexa exitosa posto que “temos a orografía perfecta que combina chaira e monte, temos o Clube Ciclista Antelano e o BTT Nocelo como referentes das dúas rodas e temos a Carlos Canal, profesional do ciclismo cunha carreira brillante”.